... ...
吳亦凡性侵案
當事人吳亦凡
日期2021年7月8號 (2021-07-08)到依家
地點 中國網上
又叫吳亦凡都美竹事件
參加嘅人
  • 吳亦凡
  • 都美竹
  • 其他唔知名受害人
到依家都仲繼續緊

吳亦凡性侵案,係指加拿大籍華人歌手吳亦凡響2021年爆出嘅性醜聞,之後演變成性侵。呢次事件響中國引起軒然大波。

當事人同背景

  • 吳亦凡加拿大籍華人歌手,前EXO成員(已經喺2014年退出)。
  • 都美竹,中國傳媒大學20級影視編導專業學生,依家係讀緊書[1] 。
  • 其他七位唔知名嘅受害人[2] 。

吳亦凡早就有關於佢嘅性醜聞。2016年,網紅「小G娜」話吳亦凡約炮,話自己係佢嘅「正牌女友」,仲有人爆出吳亦凡同人上床嘅相。之後吳話相同埋條片都係假嘅,已經交畀律師處理,事件先至平息[3] [4] 。兩年後,又有人爆料,話吳亦凡響洛杉磯某間夜店「揀女仔」,但係吳亦凡同工作室都否認,之後呢個人仲被逼講對唔住[5] 。另外,有人因為呢單嘢而幫佢改花名叫「加拿大炮王」,畀吳亦凡工作室告,最後畀差人罰咗三萬蚊[6] 。

2019年,吳亦凡拍「潮流合伙人」個陣,拍下拍下,突然之間話想帶當時17歲嘅女演員趙今麥返屋企,仲拖住趙隻手準備走人。其他人見到都嚇咗一跳,最後由Angelababy一句「可能係將佢(趙今麥)當成自己個親生女掛」嚟解圍[7] 。同年8月,吳亦凡畀人影到同北京電影學院學生秦牛正威拖手仔;而秦牛正威後嚟話自己同佢冇關係,又表示好尊重「吳亦凡老師」[8] 。

過程

都美竹爆料

2021年5月28號,吳亦凡畀人爆出響電影院同網紅「小怡同學」(中國一級體操運動員陳紫怡約會,呢條片畀人放上網後引起好多討論。吳亦凡工作室話電影院侵害咗佢嘅私隱,又指出吳亦凡係同一班朋友去電影院,而條片係畀人剪過[9] 。同日,又有人話佢早就同「小怡同學」分手,依家嘅女友係「象韻潔」(「象韻潔」後嚟話自己唔係)[10] 。

6月2號,另一位網紅「劉美麗同學」發文話自己發呢篇文章係為咗「令到網友能夠認清吳亦凡嘅渣男行為」,又放上自己同老友、19歲女當事人都美竹嘅微信記錄。佢話,吳亦凡早就響舊年12月同都美竹拍拖,之後突然玩失蹤,最後發現後來佢去食第二條女「小怡同學」,令到都美竹好傷心,甚至冇心機返學[11] 。而另一位話自己係都美竹個家姐,都話佢搞到美竹精神變差[10] 。

7月8號,都美竹響微博大爆吳亦凡有一個專門加少女嘅微信帳號(依家已經刪除),以「揀MV女主角」、「工作室簽新人」等等理由,呃啲女仔去飲酒、參加酒局,乘機灌醉佢哋,又用「我會對你負責」等等,同佢哋上床。吳亦凡工作室無耐即刻就唔認數,仲要求都美竹即刻刪咗佢,再唔係就告佢。都美竹話自己唔驚畀人告[12] 。同日,都美竹話自己收到好多恐嚇[13] 。

7月16號,都美竹又爆有越嚟越多同佢有差唔多經歷嘅女仔嚟搵佢,話畀佢知事發嘅經過,仲話:「我哋依家已經唔想要賠償,淨係想要返公道,想賠償就唔好嚟搞我哋啦。」[2] 又話自己響事後身心受到傷害,到依家都仲接受緊電擊治療[14] 。

第二日,都美竹響微博上面話自己有好多鐵證,足夠令到吳亦凡坐十年監,叫佢24個鐘頭之內宣佈退出娛樂圈;又話自己收到好多都畀吳亦凡搞過嘅女仔嘅求助,發現佢哋都係後生女、未成年,有啲仲畀佢搞到百病纏身,佢大鬧:「你(吳亦凡)揀女仔嘅要求原來都係千禧後同埋讀緊高中嘅後生女…叫啲女仔去酒吧、又叫佢哋飲酒…由強姦輪姦,由一個人到多人運動,我哋真係好嬲。」[15] 仲話:「就算我唔爆其他受害人出嚟,我都可以令到你身敗名裂。好啦,快啲準備啦。吳先生,呢次係決戰。」[16]

7月18號,都美竹接受網易嘅獨家訪問,佢話吳亦凡嘅經紀人響事發當日叫佢去吳亦凡嘅屋企,暗示可以幫佢發展演藝事業。響第一次上床之後,都美竹話想走人,但吳亦凡嘅經紀人威脅佢,如果吳玩得唔夠盡興,咁都美竹就會冇嗮前途,冇得再玩娛樂圈。於是乎都美竹就唔夠膽走人,又繼續被人逼住飲酒,直到飲醉為止。醒返之後,佢就發覺自己響吳亦凡張床上面。佢響訪問入面又話,希望自己係最後一個受害者[17] [18] 。

之後都美竹分析自己嘅處境:「我好清楚,我嘅人生肯定係毀咗㗎啦,雖然我淨係同吳一個人上過床,但大家早就當我係爛褲襠[註 1] 。第日我個老公、奶奶,一鬧起交梗係攞呢攤嘢出嚟,話唔定我嘅細路響返學嗰陣仲會畀人鬧成「公交車嘅仔女[註 2] 」。我嘅人生係毀咗,但我唔可能毀埋其他受害人。因為,我,係,個人。」[2]

協商失敗

7月16號晚,都美竹公開同吳亦凡工作室嘅微信紀錄,對方講對唔住,又話要協商,仲提出可以畀錢佢。都美竹開頭話自己加埋其他受害人一共有八位,所以要求八百萬,之後最終協商二百萬。都美竹一度諗住接受賠償,但對方要求佢刪咗之前發嘅文章,仲要求佢自己話之前爆嘅料都係假嘅;而都美竹要求吳亦凡本人公開講對唔住,但對方話「唔可能」,仲話已經請咗律師,又同佢講:「我哋好可能會告贏你。如果我哋傾點數,解決咗件事呢,就都係唔想搞到太複雜,而且我哋可以唔追究你。」[19] [20]

7月17號,雙方決定「成交」,即吳亦凡工作室賠二百萬畀都美竹;但事前吳亦凡突然要求都美竹公開其他七位受害人嘅資料,都美竹覺得吳亦凡冇心解決呢件事,所以就唔同意,協商失敗[21] 。

7月18號,都美竹響微博發相,證明自己已經退返五十萬畀吳亦凡工作室(吳亦凡工作室開頭畀定五十萬佢)[19] 。

吳亦凡嘅回應

7月19號,吳亦凡響微博回應都美竹嘅指控:

之前有回應佢係因為唔想去干擾司法程序,但估唔到我嘅沉默居然令到造謠嘅人變本加厲,真係忍唔到啦!我淨係響2020年12月5號嘅聚會上見過都美竹小姐一次咁多,我冇迫佢飲酒、冇收佢手機、更加冇做過佢所講嘅嘢。當日聚會嘅人數好多,佢哋都可以出嚟做證!我對打攪到大家講聲對唔住先。我響呢度聲明,我從來冇搞過乜野「揀女仔」!我冇「誘姦」「迷姦」!更加冇乜鬼「未成年」!如果我有做過呢類行為,大家放心,我會自己入監獄!!我對自己講過嘅嘢一律負上法律責任![22] [23]

同日,吳亦凡工作室發表聲明,話吳亦凡已經報咗警,而差人都已經開始調查,又話都美竹發表嘅多篇文章同埋講嘅嘢係假嘅。同時,工作室話佢哋從來都冇註冊過微信賬號,都美竹發嘅聊天記錄都係假嘅,又發表律師聲明[24] [25] 。晚上,吳亦凡工作室再次出嚟講嘢,重申吳亦凡淨係響2020年12月見過都美竹一次咁多、佢發出嚟嘅嘢全部都係假嘅、工作室從來都冇註冊過微信賬號、吳亦凡阿媽因為承受唔到所以先至代吳亦凡轉咗五十萬畀都美竹等等[26] [27] 。

7月20號,吳亦凡工作室發表文章,指出都美竹所講嘅嘢都係假嘅,列出幾個證據[2] [28] :

  1. 都美竹發咗八封信,威脅吳亦凡畀錢佢。
  2. 都美竹背後係一大班人響度炒作,策劃出呢單嘢。
  3. 都美竹偽造記錄,仲將錢轉咗畀第二個人。
  4. 都美竹講大話,話已經退返五十萬畀吳亦凡工作室,其實根本都冇。

公安調查

2021年7月14號,吳亦凡阿媽報警話阿仔俾人勒索[29] ;22號,北京市朝陽區公安官方微博發佈咗目前查到嘅料[30] 。

吳同都嘅關係

公安證實,響2020年12月晚上十一點幾,馮葫(28歲,吳亦凡時任經紀人)以揀MV女主角為理由,約都美竹到吳亦凡屋企參加聚會。當時十幾個人響聚會一齊飲酒同埋玩,之後其他人先後返屋企;而都美竹就響飲醉之後留響吳亦凡嘅屋企,同吳有過性交行為。下晝,都美竹響吳亦凡屋企食過飯後走人,而兩個人有加微信。12月8號,吳亦凡曾經將3.2萬蚊過畀都美竹去Shopping。直至2021年4月,兩個人都一直有聯絡[10] [31] 。

都響網上所爆嘅料

都美竹響事後聯絡老友劉小姐(公安話佢叫劉某文),兩個人認為可以提升知名度、仲可以爆紅,決定響網上爆料。6月2號,劉小姐以網名「劉美麗同學」響網上爆出都美竹畀吳亦凡冷暴力嘅指控,之後由都美竹跟進呢啲文章[31] 。 7月13號,卅一歲嘅網絡寫手徐先生主動聯絡都美竹,話自己可以幫佢寫文,都美竹應承咗。徐先生先後寫咗十幾篇有關同吳亦凡「決戰」嘅文稿,並且由都美竹響7月16號分別發上微博[31] [32] 。

案中案

6月初,二十三歲嘅劉迢迢[33] (公安話佢叫劉某迢)睇到網上都響到炒作呢單嘢嗰陣,就諗到假冒雙方去呃人嚟賺錢。劉迢迢開始扮自己都係受害人,得到都美竹嘅信任,攞到都同吳亦凡之間嘅資料。7月10號,佢扮自己係都美竹,同吳亦凡律師要求三百萬,之後又假冒吳亦凡律師同都美竹協商[29] 。

一日之後,吳亦凡阿媽分兩次將五十萬轉畀都美竹。劉迢迢因為攞唔到筆錢,繼續扮係都美竹向吳亦凡律師要求畀錢,吳亦凡律師唔肯;之後佢又扮係吳亦凡個律師要求都美竹簽協議,如果唔簽就退返五十萬。都美竹最後應承畀返錢,就向劉迢迢提供嘅賬戶轉十八萬[31] 。

劉迢迢最後響7月18號喺江蘇南通畀差佬拉咗,亦承認自己嘅罪名[29] 。

拉咗吳亦凡

7月31號,北京市朝陽區公安以「強姦罪」嘅罪名拉咗吳亦凡。而媒體《網易》、網紅大V更加爆料,話吳亦凡仲捲入有關毒品嘅罪行[34] 。

根據《中華人民共和國刑法》第6條,話唔理當事人國籍係乜,只要佢響中國犯罪,就係跟中國法律嚟判佢。而「強姦罪」響中國係比較嚴重嘅罪名,如果吳亦凡罪名真係成立,可以坐三年至七年嘅監;如果佢畀人證實係強姦未滿十四歲嘅女仔,最高可以判死刑[35] 。

另外,由於吳亦凡係加拿大籍,如果罪名成立,佢要響中國坐監,坐完監就會畀人踢出境[35] 。

8月16號,北京市朝陽區人民檢察院批准以「強姦罪」拉咗吳亦凡[36] 。

影響

「吳籤」

7月18號晚,都美竹響微轉嘅一篇文章上話吳亦凡好鬼自戀:響佢同吳性交嗰陣,吳同佢講:「我個度(性器官)好大,你要忍下」,仲希望美竹認同佢講嘅嘢:「我嗰度大唔大啊,前女朋友都話好大架」。都美竹話性交得個幾分鐘,而吳亦凡仲響事後同女方講:「點啊,我係咪好勁呢」。都響文章入面建議吳亦凡改名叫「吳籤」,因為實際嘅感覺就係想撩鼻屎嗰陣要用手指但就攞咗牙籤[37] 。

網民受到都美竹嘅「吳籤」影響,幫吳亦凡起咗好多花名(有「籤籤君子」、「吳痛針灸」、「見亦思籤」、「籤夫的愛」等等);又整咗好多梗圖[38] 。

其他受害人

受到都美竹嘅影響,其他畀吳亦凡侵犯或者傷害過嘅女仔都出嚟講嘢[38] 。7月19號,中國女藝人張丹三響微博上話,吳亦凡成日想約佢到飯店,又問佢有冇同其他人發生過性關係,仲話「吳第一次見面就摸我個bra」[39] 。

2014年,吳亦凡爆出同林西婭嘅床照,而女方亦畀人鬧咗好多年。依家輪到吳亦凡畀人爆大獲,林西婭響微博話:「等咗七年,我終於等到正義同正名」,又話自己演藝生涯大受影響,亦話自己呢七年完全冇解釋嘅機會[40] 。

7月23號,一位叫「暴躁小當ris」嘅人話自己都差啲畀吳性侵,仲響同一日去差館錄口供。佢話,當時收到吳亦凡工作室嘅人邀請佢去參加吳嘅酒局,一去到畀人收手機、又唔準佢中途走佬;現場包拮當事人在內一共有二十女四男。之後有一個男人話畀佢知,如果佢去香格里拉酒店陪吳亦凡瞓一覺,就可以攞到佢嘅微信,如果唔係就唔畀[41] 。「暴躁小當ris」唔制,就差啲畀人強行拖上車,最後係佢走得快先至冇畀人捉住,事後佢覺得好唔舒服[42] 。

至於響兩年前被爆同吳亦凡拖手仔嘅秦牛正威,話已經「徹底放下」同吳亦凡嘅戀情;又話時間真係可以撫平一切,佢都釋懷咗。另外有網民同佢講對唔住[43] 。

8月6號,美國南加州橙縣女律師王婧話,吳亦凡涉嫌響洛杉磯強姦未成年女留學生。呢個女學生當時係吳嘅Fans。目前呢單嘢仲係核實緊[44] 。

商業合作

7月18號,化妝品牌韓束響官方微博話已經單方面畀吳亦凡《解約告知函》,唔再同佢有任何商業合作[45] 。同日,中央廣播電視總台旗下嘅雲聽客戶端亦決定唔再同吳合作,唔再畀佢做「聲音推薦官」[46] 。

7月19號,先後有好多牌子,就好似華帝康師傅Tempo紙巾、王者榮耀立白騰訊視頻保時捷、蘭琴(Lancôme)、良品鋪子、樂堡、滋源,宣佈同吳解除商業合作關係[45] [47] 。而路易威登就宣佈暫停吳亦凡嘅合作關係,話等到調查結果出嚟先至再計[48] 。

7月20號,化妝品公司Bvlgari同L'Oréal S.A亦宣佈唔再同吳合作[47] ;而遊戲公司Ubisoft就響同日將吳亦凡作嘅歌《大碗寬麵》響旗下遊戲Just Dance 2020入面落欄[49] 。

當吳亦凡響7月23號畀公安拉咗之後,先前只係同佢暫停合作關係嘅路易威登即刻唔再受佢玩[50] 。

到依家,決定唔再同佢合作嘅有成15間公司,當中唔少係國際牌子[48] 。

影視作品

響事件未畀都美竹爆之前,吳亦凡淨係接咗一套劇,就係同楊紫一齊主演嘅《青簪行》。因為受到吳亦凡單嘢牽連,呢套劇畀人禁止播出嚟[51] 。片方騰訊視頻因為咁受到好大損失,據知最少有五億[52] 。

8月1號,網易雲QQ音樂酷狗音樂同埋咪咕音樂都將佢嘅歌全部落欄[53] 。一日後,Apple Music(中國區)亦跟住其他平台將佢嘅歌全部落欄[54] 。

8月4號,吳亦凡同舊東家EXO響2012年ー2014年有份參加四次《快樂大本營》(響2014年7月嗰一集,當時吳已經唔係EXO成員,但都依然畀人拉埋落水)。呢四期受到吳影響,全部落欄,想睇都冇得睇[54] 。

8月16號,即吳亦凡畀人拉咗嘅嗰日,優酷、愛奇藝、騰訊視頻、芒果TV、B站等將逢係吳亦凡出現過嘅節目一律落欄,累計有七千幾集;另外,同吳亦凡有關嘅約190萬條影片都畀人刪除[55] 。其中B站仲將「吳亦凡」睇成敏感詞,一旦有呢個名出現,就唔畀發上網[56] 。吳亦凡幾乎響中國音樂網上消失[57] 。

相關人士同社群

8月1號,吳亦凡同旗下工作室嘅微博賬號以「違規」理由畀人注消,顯示出「因被投訴違反法律法規和《微博社區公約》的相關規定,現已無法檢視」;佢響社交網站豆瓣嘅個人資料亦畀人刪除;百度吳亦凡貼吧畀人強制關門大吉;抖音賬戶畀人封鎖;而今日頭條、百度百家號、愛奇藝、騰訊視頻、央視影音將同吳亦凡有關嘅嘢落欄。另外同吳亦凡有關嘅108個「超話」、789個群組同埋990個微博賬號都先後畀人封鎖、解散[58] [59] 。

同一日,曾經講好吳亦凡嘅作家六六同埋演員馬薇薇[註 3] ,佢哋嘅微博畀人封鎖(兩個人響之前已經出嚟聲Sorry);而前《時尚芭莎》總編輯蘇芒嘅新浪微博亦畀人短暫封鎖[註 4] [60] 。

響呢次事件爆出之後,有越嚟越多同識得佢嘅藝人亦被指同呢單嘢有關係。8月2號,中國一位演員謝明皓實名舉報林俊傑同埋潘瑋柏,話佢哋同吳亦凡一齊強姦女仔、吸毒、避稅,要求公安介入。林俊傑同潘瑋柏無耐就響微博上發出律師函,仲話要追究責任[61] 。之後,包貝爾井柏然范冰冰何炅亦畀人爆出同呢單嘢有關;四個人先後都報警處理[62] 。

至於之前曾經幫過吳亦凡、或者讚佢嘅嘅演員亦畀人抄出嚟同埋惹起爭議,有李雪琴沈夢辰管虎徐靜蕾馮小剛張國立司雯嘉成龍[63] 。其中管虎已經清空自己嘅微博[64] ;李雪琴取消關注吳亦凡[65] [66] 。

評論

MeToo

對於呢單嘢可唔可以推動中國MeToo運動,各路師爺有唔同見解:有人認為單係都美竹爆嘅料,唔足以證明呢個係MeToo,甚至認為女方講法有可疑,發生性行為可能係自願[67] ;另外亦有人認為呢單嘢正正係因MeToo,先至鼓勵到受害嘅女性走出嚟,令到女性可以改變自己,唔再畀男權社會控制[68] 。

  1. 響普通話,「爛褲襠」即係指女人性濫交,同好多男人上過床咁解。
  2. 由於「公共廁所」係男人都可以去大小便,所以引伸出嚟嘅意思就係一個女人隨便同其他男人性交咁解。響普通話,「公交車」同「公共廁所」係同一個意思。
  3. 2016年,網紅「小G娜」話吳亦凡約炮嘅一單野,六六話:「...吳亦凡生得好睇,又識得氹人...到最後竟然畀人篤背脊,女方梗係博上位姐」,而馬薇薇仲話:「...吳亦凡就係個好人(活菩薩),同Fans瞓覺就好似阿頭到細餐廳食飯,有畀同Fans瞓覺更加好嘅福利咩?佢真係太親民、貼地啦!」
  4. 蘇芒曾經響2016年小G娜單嘢入面支持吳亦凡:「女方講嘅一切都係想詆毀佢。」

  1. 施予 (2021-07-20). "揭吳亦凡「選妃」式誘姦未成年少女醜聞 都美竹是何方神聖?". 香港01 (中文). 喺2021-07-28搵到.
  2. 1 2 3 4 "吳亦凡、都美竹事件整理!涉拐騙未成年、私下和解對話曝光、吳亦凡工作室澄清卻遭網打臉". VOGUE TAIWAN (中文). 喺2021-07-26搵到.
  3. "吴亦凡方回应约炮风波:音频图像系伪造". www.sohu.com (英文). 喺2021-07-25搵到.
  4. "【吳亦凡連環爆】吳亦凡再被挖「半裸事後床照」 正妹女網友:我也被約砲". 鏡週刊 Mirror Media (中文). 2021-07-20. 喺2021-08-02搵到.
  5. 网易 (2018-11-13). "网传吴亦凡夜店"选妃" 工作室怒斥谣言称将追责". www.163.com. 喺2021-07-25搵到.
  6. "吴亦凡名誉维权案胜诉:造谣"炮王"网友判赔 3 万 -ZAKER新闻". www.myzaker.com. 喺2021-07-25搵到.
  7. 世界新聞網. "吳亦凡錄影到一半牽走未成年少女 Angelababy驚險解圍". 世界新聞網 (中文). 喺2021-07-25搵到.
  8. sina_mobile (2019-08-30). "吴亦凡被拍牵手北电学生 女方换掉微博照片疑回应". ent.sina.cn. 喺2021-08-31搵到.
  9. 中時新聞網. "被爆料電影院包場約會嫩妹 吳亦凡回應了 - 娛樂". 中時新聞網 (中文). 喺2021-07-25搵到.
  10. 1 2 3 ETtoday新聞雲. "懶人包/吳亦凡酒局「20女 vs. 4男」! 4000字揪「完整時間軸」 | ETtoday星光雲 | ETtoday新聞雲". star.ettoday.net (中文). 喺2021-07-25搵到.
  11. 封面新闻 (2021-07-20). "中传教师回应都美竹事件:如需要会积极提供帮助|中传|中国传媒大学_新浪娱乐_新浪网". ent.sina.com.cn. 喺2021-07-25搵到.
  12. "吳亦凡被爆拐未成年套路「開撩妹帳號、設酒局」 工作室回應了". 鏡週刊 Mirror Media (中文). 2021-07-09. 喺2021-07-25搵到.
  13. 网易娱乐 (2021-06-03). "吴亦凡疑与18岁女学生谈恋爱 女方被曝脚踏两只船_手机网易网". 3g.163.com. 喺2021-07-26搵到.
  14. 网易 (2021-07-16). "都美竹已报警暂未起诉吴亦凡:在电击治疗 迷茫恐惧". www.163.com. 喺2021-07-26搵到.
  15. "都美竹限吳亦凡24小時宣佈退圈!手握可以送他10年牢飯的證據!曾內涵EXO隊友有狐臭!信息量超多!!". epop - 就愛玩娛樂 (英文). 2021-07-18. 喺2021-07-26搵到.
  16. 聯合新聞網. "受害網紅決戰吳亦凡 2千字揪性癖曝「那兒像牙籤」". 噓!星聞 (中文). 喺2021-08-02搵到.
  17. 网易 (2021-07-18). "专访都美竹|正分批退50万准备走法律程序 希望我是最后一个受害者". www.163.com. 喺2021-07-26搵到.
  18. Chen2021年7月21日, Elsie (2021-07-21). "被指誘姦未成年、「選妃」:吳亦凡性醜聞引發公憤". 紐約時報中文網 (中文). 喺2021-07-26搵到.
  19. 1 2 朱奕錦 (2021-07-17). "都美竹曬吳亦凡轉賬20萬記錄 團隊談判滿足三條件即賠償200萬". 香港01 (中文). 喺2021-07-27搵到.
  20. ETtoday新聞雲. "吳亦凡遭控誘騙8未成年妹! 19歲網美「被塞200萬封口費」逼洗白對話曝 | ETtoday星光雲 | ETtoday新聞雲". star.ettoday.net (中文). 喺2021-07-27搵到.
  21. ""酒局選妃"風波 付網紅130萬賠償金 吳亦凡拒道歉求和失敗". 光明日报 (中文). 喺2021-07-27搵到.
  22. "微博". m.weibo.cn. 喺2021-07-28搵到.
  23. 明報. "捲桃色風波|遭內地網紅爆大鑊 吳亦凡否認誘姦迷姦 | 明報". LINE TODAY (中文). 喺2021-07-28搵到.
  24. "吴亦凡工作室发声明斥责都美竹造假:已报案". www.toutiao.com. 喺2021-07-28搵到.
  25. "吳亦凡火了!1天發2澄清聲明 附上6張截圖證明:假的". tw.news.yahoo.com (中文). 喺2021-07-28搵到.
  26. 新浪娱乐 (2021-07-19). "吴亦凡工作室发布针对近日舆情事件的十点澄清|吴亦凡|十点澄清_新浪娱乐_新浪网". ent.sina.com.cn. 喺2021-07-28搵到.
  27. ETtoday新聞雲. "吳亦凡「列10點聲明」反咬網美勒索3400萬! 私下交易對話全曝光 | ETtoday星光雲 | ETtoday新聞雲". star.ettoday.net (中文). 喺2021-07-28搵到.
  28. 新浪娱乐 (2021-07-20). "吴亦凡工作室再发文 回应与都美竹转账争议|吴亦凡|都美竹|转账_新浪娱乐_新浪网". ent.sina.com.cn. 喺2021-07-28搵到.
  29. 1 2 3 陳進安 (2021-07-22). "吳亦凡|警通報指發生性關係屬實 背後另涉「第三者」詐騙案". 香港01 (中文). 喺2021-08-02搵到.
  30. "微博". archive.ph. 2021-07-25. 喺2021-08-02搵到.
  31. 1 2 3 4 ETtoday新聞雲. "快訊/警方公布真相! 吳亦凡「睡了都美竹」是真的…驚曝2邊都遭詐騙 | ETtoday星光雲 | ETtoday新聞雲". star.ettoday.net (中文). 喺2021-08-02搵到.
  32. 成依華 (2021-07-31). "吳亦凡涉嫌強姦 遭北京朝陽警方刑事拘留". 香港01 (中文). 喺2021-08-02搵到.
  33. "23岁刘某迢真实身份被扒:全名刘迢迢,初中学历,因父亲脑梗花费百万_娱乐新闻_娱乐星闻_新闻中心_海峡网". m.hxnews.com. 喺2021-08-02搵到.
  34. 姜庚宇 (2021-08-01). "吳亦凡被刑拘|網傳涉毒遭捕過程極狼狽 發抖大哭求饒:是第一次". 香港01 (中文). 喺2021-08-02搵到.
  35. 1 2 "律師分析:最重判死刑 吳亦凡傳涉9宗罪 淚崩求放生". hk.news.yahoo.com (中文). 喺2021-08-02搵到.
  36. 張國基 (2021-08-16). "吳亦凡事件丨北京市朝陽區人民檢察院以涉嫌強姦正式逮捕吳亦凡". 香港01 (中文). 喺2021-08-23搵到.
  37. 許祺安 (2021-07-19). "都美竹下通牒要求吳亦凡退出演藝圈 大爆床事諷「改名吳籤吧」". 香港01 (中文). 喺2021-08-03搵到.
  38. 1 2 "【吳亦凡連環爆】又一女偶像實名指認吳亦凡! 黑料不斷網狂酸「籤夫的愛」". 鏡週刊 Mirror Media (中文). 2021-07-20. 喺2021-08-03搵到.
  39. "吳亦凡醜聞連環爆!女偶像加碼控吳『見面就摸胸』狂約飯店對她喊:喜歡的女生一定要上". GirlStyle 台灣女生日常 (中文). 喺2021-08-03搵到.
  40. 朱奕錦 (2021-07-21). "吳亦凡前緋聞女友林西婭稱等到正義同正名 自爆出街曾被割腳腕". 香港01 (中文). 喺2021-08-03搵到.
  41. 林瑾 (2021-07-24). "吳亦凡事件|00後女生自爆到北京警局錄口供 曾參與「選妃」酒局". 香港01 (中文). 喺2021-08-12搵到.
  42. "吳亦凡爆皮條客團隊「酒局4男尬20女」 捲誘姦未成年恐遭判刑10年 | 蘋果新聞網 | 蘋果日報". 蘋果新聞網 (中文). 2021-07-20. 喺2021-08-12搵到.
  43. 世界新聞網. "發文談吳亦凡戀情風波 秦牛正威:徹底放下". 世界新聞網 (中文). 喺2021-08-31搵到.
  44. 朱奕錦 (2021-08-11). "吳亦凡事件 | LA華人律師爆未成年留學生遭性侵 受害者曾是粉絲". 香港01 (中文). 喺2021-09-16搵到.
  45. 1 2 許祺安 (2021-08-01). "吳亦凡涉強姦不會是最後一幕 演藝圈大染缸將掀大風暴|時事焦點". 香港01 (中文). 喺2021-08-23搵到.
  46. ETtoday新聞雲. "官媒也切割!宣布吳亦凡「參與內容全下架」 料其它品牌也將跟進 | ETtoday星光雲 | ETtoday新聞雲". star.ettoday.net (中文). 喺2021-08-23搵到.
  47. 1 2 "昔日戰友兩款命!吳亦凡涉強姦人人喊打 黃子韜暖心衝上微博熱搜 | 蘋果新聞網 | 蘋果日報". 蘋果新聞網 (中文). 2021-08-03. 喺2021-08-23搵到.
  48. 1 2 蔡苡柔 (2021-08-04). "吳亦凡事件|鄭爽吳亦凡後 千萬明星代言人「賠了夫人又折兵」?". 香港01 (中文). 喺2021-08-23搵到.
  49. "無麵可吃了!育碧緊急下架吳亦凡樂曲 | 電競". 新頭殼 Newtalk (中文). 2021-07-20. 喺2021-08-23搵到.
  50. 朱奕錦 (2021-07-21). "吳亦凡被LOUIS VUITTON總部終止合作 中國區表態陽奉陰違?". 香港01 (中文). 喺2021-08-23搵到.
  51. "內地劇《青簪行》開播無期 女主角楊紫被拖累 - 20210802 - 娛樂". 明報新聞網 - 每日明報 daily news (中文). 喺2021-08-25搵到.
  52. ETtoday新聞雲. "受吳亦凡事件波及! EXO前隊友鹿晗、黃子韜瘋傳「警局做筆錄」 | ETtoday星光雲 | ETtoday新聞雲". star.ettoday.net (中文). 喺2021-08-25搵到.
  53. "有5000萬粉絲 190萬影片下架 吳亦凡視野告消失". RFI - 法國國際廣播電台 (中文). 2021-08-18. 喺2021-09-17搵到.
  54. 1 2 新聞,評論與廣播, 伊利亞• 貢恰羅夫 Sputnik 中國-. "吳亦凡被捕會在中國帶來甚麼變化?". big5.sputniknews.cn (中文). 喺2021-09-17搵到.
  55. "190萬部影片被下架 吳亦凡幾乎消失在公眾視野 | 娛樂 | 中央社 CNA". www.cna.com.tw (中文). 喺2021-09-17搵到.
  56. "飯圈清朗行動之下的粉絲們:「內娛糟透了,我們也都知道」". theinitium.com. 喺2021-09-17搵到.
  57. "社交網都唔畀玩?廣電總局抵制違法失德藝人網絡發聲出鏡". on.cc東網 (中文). 2021-09-11. 喺2021-09-17搵到.
  58. 經濟日報. "吳亦凡帳號被陸全網封禁 多名KOL曾為其聲援亦遭禁言 | 兩岸焦點 | 兩岸". 經濟日報 (中文). 喺2021-08-29搵到.
  59. ETtoday新聞雲. "吳亦凡遭除名「變神秘數字1337000」! 被陸13平台全面下架 | ETtoday星光雲 | ETtoday新聞雲". star.ettoday.net (中文). 喺2021-08-29搵到.
  60. 聯合新聞網. "女星挺吳亦凡!鬼扯「偶像睡粉絲是福利」:菩薩顯靈". 噓!星聞 (中文). 喺2021-08-29搵到.
  61. 許祺安 (2021-08-02). "吳亦凡|林俊傑潘瑋柏遭藝人實名舉報吸毒及強姦 兩人發聲明澄清". 香港01 (中文). 喺2021-08-25搵到.
  62. "吳亦凡被刑拘瘋傳「供出名單」 4大咖「衰淪同夥」不忍了直接報警". www.ctwant.com (中文). 喺2021-08-25搵到.
  63. 中時新聞網. "頭條揭密》成龍聽候其召喚的京圈大佬倒台 吳亦凡等不到金主救援 - 政治". 中時新聞網 (中文). 喺2021-08-31搵到.
  64. 蘇國豪 (2021-08-03). "吳亦凡事件︱多名藝人微博遭關閉 扯出4年前任嬌命案網友籲重查". 香港01 (中文). 喺2021-08-31搵到.
  65. "亞洲週刊". www.yzzk.com. 喺2021-08-31搵到.
  66. 蘇子牧 (2021-08-07). "吳亦凡事件|熟人清空微博引猜測 強姦案撼動背後神秘「京圈」?". 香港01 (中文). 喺2021-08-31搵到.
  67. 黎蝸藤 (2021-07-29). "吳亦凡的性生活雖然混亂,但網紅的指控從證據來看還稱不上「Me Too」". The News Lens 關鍵評論網 (中文). 喺2021-08-31搵到.
  68. "呂頻:吳亦凡的倒下,是女性自我改變的勝利". theinitium.com. 喺2021-08-31搵到.




  Go to top  

This article is issued from web site Wikipedia. The original article may be a bit shortened or modified. Some links may have been modified. The text is licensed under "Creative Commons - Attribution - Sharealike" [1] and some of the text can also be licensed under the terms of the "GNU Free Documentation License" [2]. Additional terms may apply for the media files. By using this site, you agree to our Legal pages [3] [4] [5] [6] [7]. Web links: [1] [2]